وزیراعلیٰ بلوچستان سرفراز بگٹی کا صحافیوں کی مکمل حمایت کا اعلان
کوئٹہ: وزیراعلیٰ بلوچستان میر سرفراز بگٹی نے کہا ہے کہ آزاد، ذمہ دار اور باخبر صحافت کسی بھی جمہوری معاشرے کی بنیاد ہوتی ہے، جبکہ عوام تک درست معلومات پہنچانے اور شفافیت یقینی بنانے میں صحافیوں کا کردار انتہائی اہم ہے۔
انہوں نے کہا کہ بلوچستان کے صحافی مشکل اور چیلنجنگ حالات میں بھی اپنی پیشہ ورانہ ذمہ داریاں انجام دے رہے ہیں۔ وزیراعلیٰ نے فرائض کی انجام دہی کے دوران جانوں کا نذرانہ پیش کرنے والے بلوچستان کے 40 سے زائد صحافیوں کو خراجِ عقیدت پیش کرتے ہوئے ان کی قربانیوں کو ناقابلِ فراموش قرار دیا۔
میر سرفراز بگٹی نے کہا کہ صوبائی حکومت کوئٹہ میں صدیق بلوچ میڈیا اکیڈمی کو مکمل طور پر فعال بنانے کے لیے ہر ممکن تعاون فراہم کرے گی تاکہ صحافیوں کو جدید تربیت، تحقیق اور بدلتے میڈیا رجحانات کے مطابق پیشہ ورانہ ترقی کے مواقع میسر آ سکیں۔
انہوں نے کہا کہ حکومت صحافی برادری کو درپیش مسائل کے حل کے لیے عملی اقدامات کر رہی ہے۔ جرنلسٹس ویلفیئر اینڈومنٹ فنڈ کے لیے سیڈ منی میں اضافہ کیا گیا ہے تاکہ ضرورت کے وقت صحافیوں اور ان کے خاندانوں کو مالی معاونت فراہم کی جا سکے۔
وزیراعلیٰ نے مزید کہا کہ میڈیا ورکرز کے لیے ہیلتھ انشورنس، ایمرجنسی امداد اور مالی معاونت کے نظام کو مزید مؤثر بنانے کے لیے بھی اقدامات جاری ہیں۔
انہوں نے بتایا کہ بلوچستان میں ورکنگ جرنلسٹس کے لیے پہلی ہاؤسنگ اسکیم پر بھی پیش رفت جاری ہے اور حکومت اس منصوبے کی بروقت تکمیل کے لیے پُرعزم ہے۔
میر سرفراز بگٹی نے کہا کہ بلوچستان کی پہلی ڈیجیٹل میڈیا پالیسی کی منظوری بھی دی جا چکی ہے، جس کا مقصد ڈیجیٹل پلیٹ فارمز کے فروغ کے ساتھ ساتھ مستند پرنٹ اور الیکٹرانک میڈیا اداروں کی حمایت کرنا ہے۔
انہوں نے اس عزم کا اعادہ کیا کہ حکومت صحافتی آزادی، صحافیوں کے تحفظ اور پیشہ ورانہ خودمختاری کو یقینی بنائے گی کیونکہ ایک مضبوط اور ذمہ دار میڈیا ہی ترقی پسند معاشرے کی ضمانت ہے۔