بلوچستان میں اسٹیٹ ڈیفنس کانفرنس کا 22واں اجلاس، امن و ترقی اور سیکیورٹی اقدامات پر تبادلہ خیال

کوئٹہ( بلو چستان خبر) وزیراعلیٰ بلوچستان میر سرفراز بگٹی کی زیر صدارت اسٹیٹ ڈیفنس کانفرنس کا بائیسواں اجلاس منعقد ہوا جس میں صوبے میں امن و امان کی صورتحال، ترقیاتی منصوبوں اور گورننس کے امور کا تفصیلی جائزہ لیا گیا۔اجلاس میں کور کمانڈر بلوچستان، صوبائی وزرا، اعلیٰ سول و عسکری حکام، وفاقی و صوبائی اداروں کے نمائندوں سمیت پاکستان آرمی، فرنٹیئر کور اور پاکستان کوسٹ گارڈ کے نمائندوں نے شرکت کی۔کانفرنس ہر اکیس روز بعد منعقد ہوتی ہے جس میں گزشتہ اجلاسوں میں کیے گئے فیصلوں پر عملدرآمد کا جائزہ لیا جاتا ہے اور اسے ایک اہم رابطہ و احتسابی فورم قرار دیا جاتا ہے۔اجلاس میں شرکا کو ہدایت کی گئی کہ دستیاب تمام وسائل کو بروئے کار لا کر بلوچستان کی ترقی اور عوامی فلاح کو یقینی بنایا جائے۔وزیراعلیٰ میر سرفراز بگٹی نے کہا کہ یہ فورم صوبے میں امن و امان اور ترقیاتی پالیسیوں کے مؤثر نفاذ کے لیے ایک اہم پلیٹ فارم کی حیثیت رکھتا ہے۔ انہوں نے کہا کہ ریاست کی ذمہ داری ہے کہ ترقی کے ثمرات عام عوام تک ضرور پہنچیں۔اجلاس میں افغان مہاجرین کی واپسی کے عمل کا بھی جائزہ لیا گیا اور ہدایت کی گئی کہ ان کی واپسی باعزت، محفوظ اور منظم طریقے سے یقینی بنائی جائے جبکہ انسانی پہلوؤں کو بھی مدنظر رکھا جائے۔شرکا نے سیکیورٹی فورسز، پولیس اور عوام کی قربانیوں کو خراج تحسین پیش کیا اور ڈیوٹی کے دوران شہید ہونے والی لیڈی کانسٹیبل ملک ناز کو خصوصی طور پر خراج عقیدت پیش کیا گیا۔