پشاور( بلو چستان خبر) سکیورٹی فورسز اور قانون نافذ کرنے والے اداروں نے ضلع خیبر میں خفیہ اطلاعات پر کارروائی کرتے ہوئے 22 دہشت گردوں کو ہلاک کر دیا۔پاک فوج کے شعبہ تعلقات عامہ کے مطابق آپریشن کے دوران دہشت گردوں نے اندھا دھند فائرنگ کی جس کے نتیجے میں ایک 10 سالہ معصوم بچہ شہید ہو گیا۔ جوابی کارروائی میں فورسز نے تمام دہشت گردوں کو ہلاک کر دیا۔بیان کے مطابق ہلاک ہونے والے دہشت گردوں سے اسلحہ اور گولہ بارود بھی برآمد ہوا اور وہ علاقے میں متعدد کارروائیوں میں ملوث تھے۔ مزید دہشت گردوں کی موجودگی کے پیش نظر علاقے میں کلیئرنس آپریشن جاری ہے۔سکیورٹی اداروں نے اس عزم کا اعادہ کیا ہے کہ دہشت گردی کے خاتمے کے لیے کارروائیاں جاری رہیں گی۔صدر مملکت آصف علی زرداری نے کامیاب کارروائی پر سکیورٹی فورسز کو خراج تحسین پیش کرتے ہوئے معصوم بچے کی شہادت پر افسوس کا اظہار کیا۔ وزیراعظم محمد شہباز شریف نے بھی واقعے پر دکھ کا اظہار کرتے ہوئے شہید بچے کے اہل خانہ کے لیے صبر کی دعا کی۔
